Ljóðræn sýning á útvöldum verkum finnska arkitektsins Alvar Aalto, með áherslu á innblástur hans úr hefðbundinni japanskri byggingarlist sem hann þróaði á sinn persónulega hátt er hluti af 101 Tokyo-Snerting við Japan.

AALTO OG JAPAN

Alvar Aalto ferðaist aldrei sjálfur til Japan, en kynntist henni af eigin raun í endurgerð af tehúsi sem uppfært var á vegum þjóðfræðisafnsins í Stokkhólmi árið 1935, m.a. í kjölfar bókarinnar Japönsk íbúðarhús eftir arkitektinn Yoshida Tetsuro sem kom út árið 1935 og olli straumhvörfum á sviði evrópskrar byggingarlistar sem þá var undirlagt af hinum svokallaða "hvíta" módernisma. Aalto var frumkvöðull í að þróa hinn svala móderníska stíl í átt til meiri hlýleika og lífrænni drátta í takt við þá sannfæringu sína að maðurinn hafði djúpstæða þörf fyrir umhverfi sem veki vellíðan  og höfði til skynrænna upplifanna á formi jafnt sem rými, efnisáferð og birtu.

Hin japönsku áhrif í verkum hans eru sérstaklega áberandi í byggingum hans frá þessum tíma eins og eigin heimili hans í Riihitie-götu í Helsinki frá 1936 og meistarastykki hans Villa Mairea í Noormarkku-héraðinu í mið-Finnlandi sem byggð var á árunum 1938-39.

Einkennandi þættir svo sem hin nánu tengsl á milli innra rýmis bygginga og ytra rýmis garðs eða umhverfis, einlægar upplifanir eins og ilmur af óunnu náttúruefni, snerting við mjúkt tré, hart grjót eða gljúpan múrtein, hljóðvist í rými sem tengist öðru rými án skýrra marka-eða gleði yfir umhyggju í frágangi smáatriða má einnig finna í seinni vekrum svo sem sumarbústað hans á eyjunni Muuratsalo frá 1953 og Norræna húsi okkar íslendinga sem bygg var árið 1968.

Sýningarstjóri er Guja Dögg Hauksdóttir, arkitekt fal, cand.Arch, og deildarstjóri byggingarlistardeildar Listasafns Reykjavíkur.